Jeremiah 20
1¶ Nau Pasur, pikinini man bilong pris Imer, husat tu em nambawan gavman long haus bilong BIKPELA, i harim long Jeremaia i autim tok profet long ol dispela samting. 2Nau Pasur i paitim profet Jeremaia, na putim em long ol dispela diwai i kalabusim hanlek i stap long dua bilong banis antap bilong Benjamin, dispela i klostu long haus bilong BIKPELA. 3Na em i kamap olsem long de bihain, long Pasur i bringim Jeremaia i kam ausait long ol diwai i kalabusim hanlek. Nau Jeremaia i tokim em, BIKPELA i no bin kolim nem bilong yu Pasur, tasol Megor-misabip. 4Long wanem, BIKPELA i tok olsem, Lukim, Mi bai mekim yu stap wanpela samting long pretim yu yet nogut tru, na long olgeta wantok bilong yu. Na ol bai pundaun long bainat bilong ol birua bilong ol, na ol ai bilong yu bai lukim dispela. Na Mi bai givim olgeta Juda long han bilong king bilong Babilon, na em bai karim ol i go kalabus long Babilon, na em bai kilim ol i dai wantaim bainat. 5Na moa tu Mi bai givim olgeta strong bilong dispela biktaun, na olgeta wok bilong en, na olgeta samting i dia tru bilong en, na olgeta samting i dia tru bilong ol king bilong Juda bai Mi givim long han bilong ol birua bilong ol, husat bai kisim kago bilong pait bilong ol, na kisim ol, na karim ol i go long Babilon. 6Na yu, Pasur, na olgeta husat i stap long haus bilong yu, bai go long kalabus. Na yu bai kam long Babilon, na long dispela hap yu bai dai, na ol bai planim yu long dispela hap, yu, na olgeta wantok bilong yu, long husat yu bin autim ol giaman tok profet. 7¶ O BIKPELA, Yu bin giamanim mi, na mi bilipim Yu. Yu stap strong moa long mi, na Yu bin win. Mi stap man ol i lap nogut long en olgeta wan wan de. Olgeta wan wan i wokim pani long daunim mi. 8Long wanem, i stat long taim mi toktok, mi singaut, mi singaut long pasin pait na kago bilong pait. Bilong wanem, tok bilong BIKPELA em i kamap wanpela samting bilong sem long mi, na wanpela samting i mekim ol i lap nogut long mi, olgeta wan wan de. 9Nau mi tok, Mi bai i no inap kolim nem bilong Em moa liklik, o toktok long nem bilong Em moa. Tasol tok bilong Em i stap insait long bel bilong mi olsem wanpela paia i kuk i pas insait long ol bun bilong mi, na mi les tru long holim bek tok, na mi no inap pasim. 10Long wanem, mi harim tok bilong daunim mi long planti lain, pret long olgeta wan wan sait. Givim ripot, ol i tok, na mipela bai givim ripot long en. Olgeta lain mi save long ol i was long mi long pasim maus, i spik, Sapos i gat sans long mipela ken grisim em, na mipela bai winim em, na mipela bai bekim pe nogut bilong mipela long en. 11Tasol BIKPELA i stap wantaim mi olsem wanpela strongpela man bilong mekim ol man i pret nogut tru. Olsem na ol lain i givim hevi long mi bai sutim lek, na ol bai i no inap win. Ol bai gat bikpela sem. Long wanem, ol bai i no inap kamap gutpela. Ol man bai i no inap lusim tingting long paul bilong ol bilong oltaim oltaim. 12Tasol, O BIKPELA bilong ol ami, husat i traim ol stretpela man, na husat i lukluk long stia bilong bel na bel, larim mi lukim Yu bekim pe nogut bilong Yu long ol. Long wanem, long Yu mi bin opim wari bilong mi. 13Singim song i go long BIKPELA, yupela litimapim nem bilong BIKPELA. Long wanem, Em i bin kisim bek tewel bilong rabisman long han bilong ol man bilong mekim pasin nogut. 14¶ Tok nogut i stap long dispela de we mama i karim mi long en. No ken larim blesing i stap long dispela de mama i karim mi. 15Tok nogut i stap long man husat i karim nius long papa bilong mi, i spik, Meri i karim wanpela pikinini man long yu, na mekim em amamas tru. 16Na larim dispela man stap olsem ol dispela biktaun BIKPELA i bagarapim, na Em i no tanim bel long en. Na larim em i harim krai long moning, na singaut long belo stret. 17Bilong wanem, em i no kilim mi i dai long bel bilong mama, o long mama bilong mi i ken kamap matmat bilong mi, na bel bilong en i stap bikpela wantaim mi oltaim. 18Olsem wanem na mi kam ausait long bel bilong lukim ol hatwok na bel hevi, inap long sem i ken kaikai olgeta ol de bilong mi?
Copyright information for
TpiKJPB